أخبار بنك "إلى"

هل تعرف الخطوات الذكية لإدارة أموالك في 2021؟

عشان تحقق أي شي في الحياة، محتاج إنك تحدد الخطوات اللي لازم تتبعها. وهذا ينطبق على كل شي، ومنها الأمور المالية. اي نعم، تقدر تدير أموالك بشكل أفضل وأكثر فاعلية إذا اتبعت قواعد رئيسية بسيطة وإذا طبقت الخطوات الضرورية والمناسبة.

جمعنا لك هني خمس خطوات تسمح لك تدير أموالك بشكل ذكي هذي السنة، وممكن تطبقها من الحين.

1. فلّتر مشترياتك – قبل لا تشتري أي شي، اسأل نفسك هالسؤال: أنا ليش قاعد أشتري هالأغراض؟ خلك جريء في جوابك على هالسؤال. أغلبنا يتأثر بعوامل خارجية لما يشتري أي شي. بعض من هالعوامل: الأصدقاء ومواقع التواصل الإجتماعي والدعايات. وعشان تتحكم بصرفك، ضروري إنك تطور عادة جديدة، وهي إنك تسوي فلترة لمشترياتك حسب الحاجة والأهمية.

2. خلك واقعي – حاول تثقف نفسك عن الأشياء اللي تجهلها وممكن تكون ضبابية بالنسبة لك، خصوصًا في الأمور اللي تتعلق بالفلوس. أغلبنا، يستمع لموظف البنك وهو يتكلم من غير ما نفهم كل شي قاعد يقوله. المفروض إنك ما تتردد من الطلب من الموظف إن يشرح لك وبشكل مبسّط أكثر عن أي شي ما فهمته. من المهم بعد تثقيف النفس والتعلم عبر الموارد والأدوات المجانية المتاحة أونلاين.

3. استفيد من التكنولوجيا – بطبيعتنا كبشر، ممكن إننا ننسى نلتزم بالخطط اللي حاطينها وعشان جذي، خل إيداعك إلى حساب الحصالة تلقائي، ضيف فواتيرك الشهرية للتطبيق وراجع ملخص معاملاتك في حسابك عشان تتابع الصرف! ثلاث خطوات بسيطة بتفيدك لمدة طويلة.

4. كنسل اشتراكاتك الغير ضرورية – أغلبنا توصله رسائل وتنبيهات بأن المبلغ الفلاني تم استقطاعه من بطاقتنا مقابل خدمة اشتركنا فيها من زمان وما عدنا نستخدمها، وتكاسلنا نكنسلها. الحق علينا إحنا في هالموضوع. المفروض نحسب إشتراكاتنا كلها ونبتدي نكنسل الأشياء اللي ما نستخدمها أو مانحتاجها. وهذي نصيحة زود، استخدم البطاقة الرقمية في كل اشتراكاتك عشان يكون أسهل عليك متابعتهم.

5. تعلم مهارات جديدة – اي بالضبط. إذا تعلمت مهارات جديدة، الطبخ أو أشغال البيت مثلًا، ممكن إنك توفر الفلوس اللي بتصرفها على الطلعات أو المصاريف على أشياء تقدر تسويها بنفسك. علِّم نفسك مهارات جديدة بطرق مجانية ومن غير ما تصرف فلوس. بهالطريقة انت الربحان في كل الأحوال؛ لأنك بتتعلم شي جديد وبتوفر فلوس في نفس الوقت.

حاول إنك تبتدي من بكرة في تطبيق خطوة وحدة على الأقل، وتابعوا مقالاتنا الياية!