أخبار بنك "إلى"

من أفضل القواعد المالية اللي ممكن تطبقها بكل سهولة هي قاعدة 50/30/20 للتحكم في الميزانية وعشان تساعدك في تقسيم ميزانيتك بشكل مرتب.

والقاعدة هي عبارة عن تخصيص 50% من الميزانية للمصاريف الأساسية مثل دفع الفواتير والإيجارات ومصاريف السيارة وماچلة البيت وغيرها. ثاني شي، تخصص 30% من الميزانية للطلعات ويا الربع أو الأكل في المطاعم أو السفرات أو الكماليات والترفيه. أمّا الـ20% الأخيرة، يتم تخصيصها للمدّخرات أو حق تستثمرها أو للتقاعد.

50% - انت محتاج تصرف على شنو بالضبط؟

هالنسبة تشمل الفواتير اللي لازم تسددها والأشياء الأساسية في الحياة، مثل إيجار البيت وأقساط السيارة وماچلة البيت والتأمين ومصاريف الرعاية الصحية وما شابه.

30% - هني لعبتك انت! وممكن تعدّل على راحتك في هالجزء. هني ممكن انت تحدد شنو الأساسي بالنسبة لك أو لا، مثل انك تشتري اللي خاطرك فيه أو تحجز في مطعم أو تسافر في إجازة، إلى آخره. لكن اذا قدرت انك تتحكم شوي في رغباتك وتقللها، بحيث إنك تضيف للجزئية الثالثة، هني تبتدي تتعلم صج.

20% - هالفلوس بتروح حق الإستثمار أو التوفير حق وقت الضرورة. بالمختصر، هالجزء مثل حساب توفير تقدر تكبره على راحتك. بس نصيحة سريعة، لازم تدّخر لك مبلغ حق وقت الضرورة، وهذا أهم شي تبتدي فيه.

شلون صارت قاعدة 50/30/20 للتحكم في الميزانية قاعدة مفضلة عند الكثير من الناس؟

لأنه وببساطة، الناس تحب إنها تقسّم وترتب الأشياء. فإذا قدرت انك تقسم مدخولك لفئات محددة وواضحة، حزّتها تقدر تحقق توازن بين أهدافك والأشياء الأساسية اللي انت محتاجها والرغبات اللي تبيها. هذي الطريقة تسمح لك بعد ان تتعرف على أولوياتك، خصوصًا لما تفصل احتياجاتك عن رغباتك.

اذا اتكلمنا عن الميزانية وترتيبها، للكل نقطة بداية مفصّلة حسب وضعه، وهذا يسمح لك إنك تشوف فلوسك بطريقة مختلفة وتعديل الطريقة اللي بتصرفها فيها.

ليش ماتستخدم قاعدة 50/30/20 مع حصالاتك؟
- افتح حصالة إلى كل احتياجاتك، مثل تأمين سيارتك أو أي شي كبير ناوي تشتريه
- خطط للي تبيه من خلال التحكم في ميزانك مع الحصالة حق عطلتك الياية، الساعة اللي خاطرك فيها
- حدد ميزانية توفيرك من خلال الإيداع التلقائي للحصالة من حسابك الجاري بشكل شهري